បុណ្យប្រពៃណី នារីកំលោះ
តែងកាយឆោមស្រស់ រាំវង់ឆ្នាំថ្មី
ខ្លះរាំលក់ផ្កា កញ្ញាមេត្រី
កំលោះប្រិមប្រិយ សុំនាងចូលរាំ។
មួយឆ្នាំមានម្តង កន្លង់ជិតឆ្ងាយ
រាំអោយអស់ដៃ បីថ្ងៃកន្លង
បុប្ផាស៊ីវិល័យ កុំប្រកាន់ឆ្គង
រាំជាគូគ្រង ឆ្លងបុណ្យចូលឆ្នាំ។
ក្រមុំរាំទន់ ភ្លន់គួរមេត្រី
កំលោះវាងវៃ ច្នៃរាំសមសួន
លើកដៃឡើងរាំ មួយពីរបីបួន
ចម្រៀងតាមក្បួន ភ្លេងជួនរណ្តំ។
ប្រុសស្រីទាំងអស់ ឆ្នាំនេះឆ្នាំថ្មី
រាំប្រជាប្រិយ រីករាយមនោរម្យ
រាំវង់ក្នុងវត្ត ចាស់ក្មេងសណ្តំ
រាំលេងក្នុងភូមិ បុណ្យចូលឆ្នាំថ្មី។
និពន្ធដោយ៖ ប៉ុក បញ្ញាវុធ (១៦.០៤.២០១៣)
